ថ្មីៗនេះ អាជ្ញាធរបឹងទន្លេសាបបានកំណត់តំបន់ព្រៃលិចទឹក និងធ្វើការបោះបង្គោលជុំវិញ។
ព្រៃលិចទឹកនៅក្នុងបឹងទន្លេសាប
លោក ចាន់ យុត្ថា ជាអគ្គលេខាធិការអាជ្ញាធរបឹងទន្លេសាប បានមានប្រសាសន៍ថា ក្រោយពេលបោះបង្គោលកំណត់ព្រំដីតំបន់ព្រៃលិចទឹកនេះរួច ហើយបើមានវិធានការការពារតឹងរឹងនោះ ធនធានជលផលនឹងកើនឡើងប្រមាណ ៦០ភាគរយ ៖ «ប៉ុន្តែយើងគិតថា បើសិនជាយើងរក្សាបាន ហើយមានការកែទម្រង់មួយចំនួនទៀត ក្រោយពេលធ្វើការងារទាំងអស់ថា យើងគិតថា ធនធានជលផលរបស់យើងនឹងកើនឡើងដល់ ៦០ភាគរយទេ ក៏អាចកើនឡើងក្បែរនេះដែរ»។
លោក ចាន់ យុត្ថា បានឲ្យដឹងថា ចាប់តាំងពីឆ្នាំ២០០៥ ដល់ឆ្នាំ២០១០ ផ្ទៃដីព្រៃលិចទឹកជាង ១៥ម៉ឺនហិកតារត្រូវបានគេកាប់រានធ្វើស្រែ ដែលធ្វើឲ្យប៉ះពាល់ដល់ធនធានជលផល ពិសេសគឺត្រី។ លោកបញ្ជាក់ថា ក្នុងចំណោមផ្ទៃដីជាង ១៥ម៉ឺនហិកតារនោះ ត្រូវបានរឹបអូសយកមកវិញខ្លះៗ ហើយ នៅក្នុងខែត្រពោធិ៍សាត់ និងខែត្របាត់ដំបង ៖ «ផ្ទៃដីទាំងនោះ បានន័យថា បើគេគ្រាន់តែកាប់ ឬក៏ដុត បានន័យថា គេមិនគាស់រំលើងគល់ទេ ក្នុងរយៈពេល ៣ឆ្នាំ វានឹងដុះឡើងវិញ ចំពោះផ្ទៃដីគាស់រានហើយ បើមិនដុះទេ យើងនឹងមានវិធានការដាំឡើងវិញ នៅពេលខាងមុខ»។
អនុប្រធានសម្របសម្រួលកម្មវិធីបឹងទន្លេសាប លោក ឯក ចំរើន បានស្វាគមន៍ចំពោះអាជ្ញាធរបឹងទន្លេសាប ដែលបានរៀបចំកំណត់ព្រំដីតំបន់បឹងទន្លេសាបនេះ។ ប៉ុន្តែលោកបានសំដែងនូវការព្រួយបារម្ភចំពោះផលប៉ះពាល់ដល់ប្រជា ពលរដ្ឋមួយចំនួន ដែលបានកាប់រានព្រៃលិចទឹកយកដីធ្វើស្រែ ហើយត្រូវបានអាជ្ញាធរបឹងទន្លេសាប នឹងដកហូតយកវិញនោះ ៖ «អ្នក ដែលមានផ្ទៃដីដាំដុះហើយ បើសិនជាគេដកហូតយកវិញ អ្នកប៉ះពាល់ជីវភាពដែរ តែវាអាស្រ័យលើច្បាប់ អនុក្រឹត្យ ថាតើគេរឹបអូសយកទាំងអស់ ឬឲ្យពួកគាត់ធ្វើបន្ត»។
លោក ចាន់ យុត្ថា បានបញ្ជាក់ទៀតថា តំបន់ព្រៃលិចទឹកនៅក្នុងទសវត្សរ៍ឆ្នាំ១៩៦០ មានផ្ទៃដីជាង ១លានហិកតារ។ លោកបានអះអាងថា នៅប្រទេសកម្ពុជា ធនធានត្រីមិនសូវសំបូរដូចពេលកន្លងមក ដោយសារតែឈ្មួញបានធ្វើអាងទឹកធំៗ និងការកាប់រានព្រៃលិចទឹក នៅតំបន់បឹងទន្លេសាប ប៉ុន្តែអាងទឹកធំៗ ចំនួន ១៩៩អាង នៅក្នុងតំបន់២ និងតំបន់៣ មានន័យថា តំបន់រក្សាព្រៃលិចទឹកនៅជុំវិញបឹងទន្លេសាប ហើយអាងទាំងនោះ គេរំលាយចោលបានចំនួន ២៨អាងរួចហើយ អាជ្ញាធរជាតិកំពុងធ្វើការរំលាយអាងទឹកនៅសល់ជាបន្តទៀត៕
